Daar kom ‘n oomblik wanneer ‘n
talent wat deurgaans van krag tot
krag gegroei het in volkleur blom. Vir
Refentse het daardie oomblik
aangebreek met sy blinknuwe album,
“Liefdegenerasie”.
Met hierdie twaalf-snit album delf hy
dieper as ooit om ‘n ryke en
eiesoortige musikale skat te ontgin –
iets wat, in die saamsmee van
poëtiese liriek en musiek wat dit nie
deur norme laat voorskryf nie, ‘n
ander sy van hierdie merkwaardige
jong talent se karakter na vore laat
tree.
Die album skakel moeiteloos tussen
meer akoestiese en vol orkes oomblikke, met ‘n verskeidenheid genres wat daarby ingeweef is –
kontemporêre en alternatiewe elemente, rock, reggae en selfs ‘n tikkie kletsrym wat die volle
omvang van Refentse se vokale vernuf ten toon stel en soos ‘n splinternuwe, pasgemaakte baadjie
aan hom sit.
Dit word uitstekend gekomplementeer deur eersteklas instrumentale verwerkings, met klavier,
kitaar, bas, trom, trekklavier, saksofoon, viool en klankeffekte wat nie huiwer om ongekarteerde
gebiede te verken en nuwe klanke te skep nie, sowel as uitmuntende agtergrondsang en harmonie,
wat beide help om ‘n ryk, diep, trots Suid-Afrikaanse egtheid aan die album te verleen.
Diep denker snitte soos “Reisiger”, “Deurmekaar”, “Doringkroon” en “As almal ver is” word
afgewissel met die opbeurende trant van die titelsnit en “Ek glo in liefde”, die amperse speelsheid
van liedjies soos “Baie gevaarlik” en “Beauty of Africa”, en die aangrypende Zulu-weergawe van ‘n
ou bekende, “Jantjie”.
Twee skitter-duette – ‘n blinknuwe verwerking van “Suikerbossie” met Stef Bos en ‘n nuutskepping,
“Dalk”, met Elandré – pronk ook op hierdie album en sal, in pas met die ander tien snitte, nie toelaat
dat jy slegs een of twee maal daarna luister nie.
“Liefdegenerasie” merk nog ‘n groot sprong vorentoe vir een van Suid-Afrika se mees gewilde jong
kunstenaars. ‘n Wonderlik eiesoortige, keurig-verwerkte en inspirerende werk wat jou meevoer na
die verste uiterstes van jou binneste, waar Refentse jou aanvuur om deel van die liefdegenerasie te
wees – ‘n móét vir enige goeie musiekversameling!