Die gewilde Afrikaanse partytjiegroep JAN JAN JAN is terug met nog ’n absolute treffer wat gereed is om elke braaivleisvuur, sokkie en partytjie aan die gang te sit. Hul splinternuwe enkelsnit, Liefde In 'n Loopdop, is ’n viering van alles wat ons kultuur op sy lekkerste maak – liefde, kuier, en natuurlik, ’n goeie loopdop!

Hierdie splinternuwe liedjie is geskryf en vervaardig deur die talentvolle Hugo Ludik en Nic Jordaan van Muse Studios, wat al bekend is vir hul werk aan verskeie radio-treffers in die Afrikaanse musiekbedryf.

Met ’n lekker boeremusiek-invloed, dansbare ritmes en Jan Jan Jan se kenmerkende eiesoortige styl, is Liefde In 'n Loopdop allesbehalwe subtiel – dis gemaak om luidkeels saam te sing en op sokkies te dans. Die snit meng die temas van liefde en lekker kuier op ’n unieke manier wat net Jan Jan Jan regkry.

"Ons wou iets maak wat soos ’n ou vriend voel – daardie een liedjie wat jy aan die gang sit as die kole reg is, die glas vol is en die geselskap goed is," sê die groep.

"Liefde in ’n Loopdop" word op 20 Junie 2025 vrygestel, saam met die musiekvideo, wat dieselfde dag op YouTube en sosiale platforms verskyn.

Die snit sal beskikbaar wees op alle digitale musiekplatforms – maak seker jy voeg dit by jou partytjie-playlist, want dié ene gaan beslis jou voete laat jeuk!